एक सुंदर नाते
प्रेमाने जोपासलेले
तळहाताच्या फोडासारखे
हळुवारपणे जपलेले
एक सुंदर नाते
मनाच्या गाभाऱ्यातले
देवाच्या मुर्तीसारखे
पवित्रपणे पुजलेले
एक सुंदर नाते
देहभान संपलेले
हृदयाचे ठोके आणि
श्वासांशी एकरूप झालेले
एक सुंदर नाते
जाणिवांच्या पलीकडले
तुझी चेतना आणि
माझे अस्तित्व हरवलेले
एक सुंदर नाते
आपल्या अतूट विश्वासाचे
एका नंतर दुसरा श्वास
ह्याच आधारावर टिकलेले
एक सुंदर नाते
स्वतःला विसरलेले
ठेच मला अश्रू तुझे
माझ्या डोळ्यांतून वाहिलेले
असे एक सुंदर नाते
जे माझ्यासाठी जीवन होते
असे ते नाते फक्त
तुझे आणि माझे 

तुझे आणि माझे