राहीले ओठातल्या ओठात वेडे शब्द माझे
भेट होती आपुली का ती खरी, की स्वप्न माझे ?

कापरे ते हात हाती, बावरे डोळ्यात आसू
आग पाण्यातून पेटे जाळणारे गोड हासू
दोन थेंबांच्या क्षणाचे प्रीतीचे तकदीर माझे

गर्द हिरवे पाचपाणी रक्तकमळे कुंकूमाची
खेळताना बिंबलेली शुभ्र जोडी सारसांची
आठवे ? म्हटलीस ना तू ? हे हवेसे विश्व माझे

मी म्हणू कैसे फुला रे, आज तू नाहीस येथे
वेल दारी सायलीची रोज अजुनी बार देते
लाख पुष्पे तोडल्यावीण, ये भरोनी पात्र माझे